മത്തി(ചാള) വിവിധ രീതിയിൽ

 

നമ്മുടെ നാട്ടിൽ സുലഭമായ മത്തി വിറ്റാമിനുകളാലും മിനറലുകളാലും സമ്പുഷ്ടമാണ്. വിറ്റമിൻ ബി, ബി 12 എന്നിവയുടെ ഉറവിടമായ മത്തിയുടെ   ഉപയോഗം  നാഡിവ്യൂഹത്തിന്റെ പ്രവർത്തനങ്ങളെ   സഹായിക്കാൻ ഉതകുന്നു.  ഇതിൽ അടങ്ങിയിരിക്കുന്ന ഒമേഗ 3 ഫാറ്റി ആസിഡ് ഹൃദ്രോഗം, അൽഷിമേഴ്സ് തുടങ്ങിയവയെ പ്രതിരോധിക്കാൻ സഹായിക്കുന്നു.  ഫോസ്ഫറസ്, പൊട്ടാസ്യം, പ്രോടീൻ, കാത്സ്യം, വിറ്റമിൻ ഡി എന്നിവയാലും സമ്പുഷ്ടമായ മത്തി നിത്യാഹാരത്തിൽ ഉൾപ്പെടുത്തുന്നത് നല്ലതാണ്.   

 മത്തി പൊള്ളിച്ചത് 

ചേരുവകൾ: 

• മത്തി വൃത്തിയാക്കിയത് - അരക്കിലോ 
• ഉള്ളി അരിഞ്ഞത് - അരക്കപ്പ് 
• പച്ചമുളക് വട്ടത്തിൽ അരിഞ്ഞത് - ഒരു ടേബിൾ സ്പൂണ്‍ 
• ഇഞ്ചി ചെറുതായി അരിഞ്ഞത് - ഒരു ടീസ്പൂണ്‍ 
• വെളുത്തുള്ളി ചെറുതായി അരിഞ്ഞത് -  ഒരു ടീസ്പൂണ്‍ 
• കറിവേപ്പില - രണ്ടു തണ്ട് 
• മഞ്ഞൾപ്പൊടി - അര ടീസ്പൂണ്‍ 
• മുളകുപൊടി - ഒരു ടേബിൾസ്പൂണ്‍ 
• ഉപ്പ് - പാകത്തിന് 
• കട്ടിയുള്ള തേങ്ങാപ്പാൽ - അരക്കപ്പ് 
• വെളിച്ചെണ്ണ - ഒരു ടേബിൾസ്പൂണ്‍ 

പാകം ചെയ്യുന്ന വിധം:

അരിഞ്ഞു വെച്ചിരിക്കുന്ന ഉള്ളി, പച്ചമുളക്, ഇഞ്ചി, വെളുത്തുള്ളി , ഒരു തണ്ട് കറിവേപ്പില എന്നിവ ഉപ്പും കാൽ സ്പൂണ്‍ വെളിച്ചെണ്ണയും ചേർത്ത് നന്നായി ഞെരടിത്തിരുമ്മി വെക്കുക. ഒരു ചീനച്ചട്ടി അടുപ്പിൽ വെച്ച് ബാക്കിയുള്ള വെളിച്ചെണ്ണ ഒഴിച്ച്  ചൂടാകുമ്പോൾ തിരുമ്മി വെച്ചിരിക്കുന്ന ചേരുവകൾ നന്നായി വഴറ്റുക. അതിലേക്ക് മഞ്ഞൾപ്പൊടിയും മുളകുപൊടിയും ചേർത്ത് വീണ്ടും വഴറ്റുക. ശേഷം വൃത്തിയാക്കി വെച്ചിരിക്കുന്ന മത്തിയും തേങ്ങാപ്പാലും ചേർക്കുക. ചെറിയ തീയിൽ വേവിച്ചെടുക്കുക. തേങ്ങാപ്പാലിലെ എണ്ണ തെളിഞ്ഞു വറ്റണം. മസാല മീനിൽ പൊതിഞ്ഞിരിക്കണം. അടുപ്പിൽ നിന്നിറക്കി ബാക്കി കറിവേപ്പില മീതെയിട്ട് കുറച്ചു നേരം അടച്ചു വെച്ചതിനു ശേഷം ഉപയോഗിക്കാം.

മത്തി കട്ട്ലറ്റ് 

ചേരുവകൾ: 

• വൃത്തിയാക്കിയ മത്തി - അരക്കിലോ 
• തേങ്ങ ചിരകിയത് - അരക്കപ്പ്‌
• ഉള്ളി - കാൽക്കപ്പ് 
• പച്ചമുളക് - എട്ടെണ്ണം 
• ഇഞ്ചി - ഒരു ചെറിയ കഷണം 
• കറിവേപ്പില - ഒരു തണ്ട് 
• മഞ്ഞൾപ്പൊടി - കാൽ ടീസ്പൂണ്‍ 
• ഉപ്പ് - പാകത്തിന്  
• വെളിച്ചെണ്ണ - വറുക്കാൻ ആവശ്യത്തിന് 

പാകം ചെയ്യുന്ന വിധം:

വൃത്തിയാക്കിയ മത്തിയുടെ നടുവിലുള്ള മുള്ള് എടുത്തു കളയുക. ബാക്കി ചേരുവകളും ചേർത്ത് മിക്സിയിൽ തരുതരുപ്പായി അരയ്ക്കുക. ഒരു പാത്രത്തിൽ ഇട്ട് നന്നായി യോജിപ്പിച്ചതിനു ശേഷം ഓരോ ഉരുളകളായി എടുത്ത് കട്ട്ലറ്റ് രൂപത്തിലാക്കി ചൂടായ വെളിച്ചെണ്ണയിൽ വറുത്തെടുക്കുക . 

മത്തിക്കറി

ചേരുവകൾ: 

• വൃത്തിയാക്കിയ മത്തി - അരക്കിലോ 
• ഉള്ളി വട്ടത്തിൽ ചെറുതായി അരിഞ്ഞത്  - കാൽക്കപ്പ് 
• പച്ചമുളക് വട്ടത്തിൽ അരിഞ്ഞത് - ഒരു ടേബിൾ സ്പൂണ്‍ 
• ഇഞ്ചി ചെറുതായി അരിഞ്ഞത് - ഒരു ടേബിൾ സ്പൂണ്‍ 
• വെളുത്തുള്ളി ചെറുതായി അരിഞ്ഞത് - ഒരു ടേബിൾ സ്പൂണ്‍ 
• കുടമ്പുളി അഥവാ മീൻപുളി ചെറുതായി അരിഞ്ഞത് - അര ടേബിൾ സ്പൂണ്‍ 
• കറിവേപ്പില - മൂന്നു തണ്ട് 
• മഞ്ഞൾപ്പൊടി - കാൽ ടീസ്പൂണ്‍ 
• മുളകുപൊടി - അര ടീ സ്പൂണ്‍ 
• ഉപ്പ് - പാകത്തിന് 
• വെള്ളം - അരക്കപ്പ് 

പാകം ചെയ്യുന്ന വിധം:

മത്തിയും വെള്ളവും ഒഴികെയുള്ള ചേരുവകൾ ഒരു മണ്‍ചട്ടിയിലാക്കി കൈ കൊണ്ട് നന്നായി തിരുമ്മി യോജിപ്പിക്കുക.  അതിലേക്ക് മത്തിയും വെള്ളവും ചേർക്കുക. അടുപ്പിൽ വെച്ച് ചെറിയ തീയിൽ വെള്ളം വറ്റിച്ചു  വേവിച്ചെടുക്കുക. 

ഹൃദ്രോഗികൾക്ക് പറ്റിയ കറിയാണിത് .

ഒരു സോസിന്റെ ജന്മകഥ

അവധിദിവസത്തിന്റെ ആലസ്യത്തിൽ മടിപിടിച്ചിരിക്കുമ്പോഴാണ് ആലുടിക്കി ഉണ്ടാക്കിയാലോ എന്നു മോൾ ചോദിക്കുന്നത്. വായനയുടെ ഗൗരവത്തിൽ ആണെന്നു ധരിച്ചോട്ടെയെന്ന് മനസ്സിൽ പറഞ്ഞുകൊണ്ട്,   കേൾക്കാത്ത ഭാവത്തിൽ കൈയിലിരുന്ന പുസ്തകത്തിലേക്ക് കണ്ണുംനട്ടിരുന്നു.  പക്ഷേ, അവൾ വിടുന്ന മട്ടില്ല.... ഹോ, അമ്മ അന്നുണ്ടാക്കിയ ആലുടിക്കിയുടെ സ്വാദ് , കൂട്ടുകാർ അതിനെക്കുറിച്ച് വർണിച്ചത് .... എന്നൊക്കെ പറഞ്ഞുകൊണ്ടിരുന്നു. അറ്റകൈക്ക് 'ഞാനൂടെ സഹായിക്കാം അമ്മാ...' എന്നു പറഞ്ഞ്   എന്നിലെ അമ്മയെ സെന്റിയാക്കി ....  

പിന്നെ, രണ്ടുപേരും കിച്ചണിലേക്ക് .... ഫ്രിഡ്ജ് തുറന്നുപിടിച്ച്, എന്തു വേണമെന്നറിയാതെ കുറച്ചു നേരം വെജിറ്റബിൾട്രേയിലേക്കു തുറിച്ചുനോക്കി നിന്നു... നോട്ടം ഭയന്നിട്ട് ഉരുളക്കിഴങ്ങും പച്ചമുളകും മെല്ലെ തക്കാളിയുടെ പിന്നിൽ ഒളിക്കാനൊരു ശ്രമം. എന്നെയാരും തൊടില്ലയെന്ന് തക്കാളിയിങ്ങനെ അഹങ്കാരത്താൽ ചുവന്നുതുടുത്ത് തലയുയർത്തിപ്പിടിച്ച് എന്നെയൊന്നു നോക്കി. അപ്പോഴാണ്‌ തക്കാളിയുടെ അഹങ്കാരത്തിൽ പരിഭ്രമിച്ച സോസിന്റെ കാലിയായ കുപ്പി നിലതെറ്റി വീഴാനാഞ്ഞത്.  

പിന്നെയൊന്നും ആലോചിച്ചില്ല, അഹങ്കാരിയായ തക്കാളിയെത്തന്നെ ആദ്യം പിടികൂടി. വെള്ളത്തിലിട്ട് കുളിപ്പിച്ചെടുക്കാൻ മോളെ ഏൽപ്പിച്ചു. ഏകദേശം ഒരു കിലോയോളം ഉണ്ടായിരുന്നു. കുക്കറിൽ വെച്ച് ഒരു നെലോളി പുറത്തേക്കു വരുന്നതുവരെ അടുപ്പിൽ വെച്ച് കത്തിച്ചു . ചൂടൊന്നാറിയപ്പോൾ എടുത്ത് അരിപ്പയിൽവെച്ച് നല്ലവണ്ണം തേച്ച് , അരിച്ചെടുത്തു.

എന്നിട്ട് ഒരു ചീനച്ചട്ടിയിലാക്കി വീണ്ടും അടുപ്പത്തുവെച്ചു. ഇത്തവണ കൂട്ടിനു ഒരു ടേബിൾസ്പൂണ്‍ മുളകുപൊടിയും ഒന്നരക്കപ്പ് പഞ്ചസാരയും അരക്കപ്പ് വിനാഗിരിയും ഓരോ ടീസ്പൂണ്‍ ഇഞ്ചിയും വെളുത്തുള്ളിയും അരച്ചതും  ഉപ്പും എല്ലാം  ഉണ്ടായിരുന്നതുകൊണ്ട് തക്കാളിയുടെ അഹങ്കാരത്തിന് ചെറിയ ശമനമുണ്ടായിരുന്നു. അഞ്ചു കരയാമ്പൂവും രണ്ടു കറുവാപ്പട്ടയുംകൂടെ ഒരു കിഴികെട്ടി അതിലേക്ക് ഇട്ടുവെച്ചു. നന്നായി തിളച്ചുകുറുകിവന്നപ്പോൾ കിഴിയെടുത്തുമാറ്റി. കുറച്ചെടുത്ത് രുചിച്ചുനോക്കിയിട്ട്, 'ഉം, കൊള്ളാം' എന്ന് മോൾ തലകുലുക്കി.....

പിന്നെ, തണുത്തുകഴിഞ്ഞപ്പോ സോസിനെ കുപ്പിയിലാക്കി, ഭദ്രമായി, പൂട്ടി വെച്ചു.

• 
  

നാരങ്ങ അച്ചാർ

ആവശ്യമുള്ള സാധനങ്ങൾ :

• നാരങ്ങ - 250 ഗ്രാം 
• ഇഞ്ചി നീളത്തിൽ മുറിച്ചത് - ഒരു ടീസ്പൂണ്‍ 
• വെളുത്തുള്ളി നീളത്തിൽ മുറിച്ചത് - ഒരു ടീസ്പൂണ്‍
• പച്ചമുളക് വട്ടത്തിൽ അരിഞ്ഞത് - ഒരു ടീസ്പൂണ്‍ 
• മഞ്ഞൾപ്പൊടി - ഒരു ടീസ്പൂണ്‍ 
• മുളകുപൊടി - 3 ടീസ്പൂണ്‍ 
• ഉപ്പ് - പാകത്തിന് 
• വിനിഗർ - അര കപ്പ് 
• എണ്ണ - അര ടീസ്പൂണ്‍ 
• കടുക് - അര ടീസ്പൂണ്‍ 
• ഉലുവ - അര ടീസ്പൂണ്‍ 
• ഉണക്ക മുളക് - 3 / 4 
• കറിവേപ്പില - ഒരു തണ്ട് 

പാകം ചെയ്യുന്ന വിധം :

നാരങ്ങ കഴുകി വെള്ളം തുടച്ചെടുത്ത് നാലായി മുറിക്കുക. ഇഞ്ചി, പച്ചമുളക്, വെളുത്തുള്ളി , മഞ്ഞൾപ്പൊടി , മുളകുപൊടി, ഉപ്പ് എന്നിവ ചേർത്ത് നന്നായി മിക്സ്‌ ചെയ്ത് രണ്ടു മണിക്കൂർ നേരമെങ്കിലും വെക്കണം. 

ചൂടായ പാത്രത്തിൽ എണ്ണയൊഴിച്ചു ചൂടാകുമ്പോൾ യഥാക്രമം കടുക് , ഉലുവ, ഉണക്കമുളക്, കറിവേപ്പില പൊട്ടിക്കുക . അതിലേക്ക് മിക്സ്‌ ചെയ്തു വെച്ചിരിക്കുന്ന നാരങ്ങ ചേർത്ത് വിനിഗറും ചേർത്ത് തിളപ്പിക്കുക. തിളക്കുമ്പോൾ തീ കുറച്ച് ,  നാരങ്ങ വേവിക്കുക. ഉപ്പ് പോരെങ്കിൽ വീണ്ടും ചേർക്കാവുന്നതാണ്. നാരങ്ങ വെന്തു കഴിഞ്ഞാൽ ഇറക്കി വെച്ച് , തണുക്കുമ്പോൾ കുപ്പിയിൽ ആക്കുക . ഏറെ നാൾ കേടുകൂടാതെയിരിക്കും.

 ഇരിക്കുന്തോറും രുചി കൂടുകയും ചെയ്യും .

കാനഡയിലെ ആൽബർട്ടയിൽ ഉള്ള  പ്രിയ  സുഹൃത്ത്‌  കല്പനയ്ക്ക്  വേണ്ടി തയ്യാറാക്കിയത് 

എളുപ്പത്തിലൊരു കടല സ്റ്റ്യൂ

കഴിഞ്ഞൊരു ദിവസം ഫേസ്ബുക്കില്‍ പച്ചവെളിച്ചം തെളിച്ചപ്പോള്‍ തന്നെ കുഞ്ഞേച്ചീ എന്ന വിളിയൊച്ചയോടെ ഒരു ജാലകം തുറന്നു വന്നു. നോക്കിയപ്പോള്‍ , നമ്മുടെ കൊട്ടില ...! ഫാക്ടറിക്കുള്ളില്‍ എവിടെയോ  ഫോണ്‍ നഷ്ടപ്പെട്ടു പോയ സങ്കടക്കടലില്‍ നിന്നുള്ള വിളിയല്ലേ ഒന്നെത്തി നോക്കി അങ്ങോട്ട്‌...... 

അപ്പോഴതാ, അവിടെ സങ്കടവുമില്ല കരച്ചിലുമില്ല... ( വിശപ്പിന്റെ മുന്നില്‍ അതൊക്കെ എങ്ങോ പോയീത്രെ ...:) കടല സ്റ്റ്യൂ എങ്ങിനെയാ ഉണ്ടാക്കുകയെന്നു ഒന്നെളുപ്പം പറഞ്ഞേ കുഞ്ഞേച്ചീ... കടല കുതിര്‍ത്തു വച്ചിരിക്കുന്നു, സവാളയും ഇഞ്ചിയും അരിഞ്ഞു വെച്ചിരിക്കുന്നു.... 

ഓ, അപ്പോഴതാണ് കാര്യം, കടല സ്റ്റ്യൂ, ...! എന്നാപിന്നെ ഇന്നത്തെ പാചകപരീക്ഷണം  ഓണ്‍ലൈനിലൂടെ ആകട്ടെയെന്നു വച്ചു.

ബിജൂ,  ആ കടല കുറച്ചു സവാളയും ഇഞ്ചിയും പച്ചമുളകും ഉപ്പും ചേര്‍ത്ത് വേവിക്കാന്‍ വെക്കൂ... 

മെസേജ് വായിച്ച് ബിജു കമന്ററി നടത്തി... കൂടെയുള്ള മിടുക്കന്മാര്‍ കടല വേവിക്കാന്‍ വച്ചു.

ഇനി, ഒരു കാല്‍ ടീസ്പൂണ്‍   മഞ്ഞള്‍പ്പൊടിയും രണ്ടു ടേബിള്‍ സ്പൂണ്‍ മല്ലിപ്പൊടിയും അര ടീസ്പൂണ്‍ കുരുമുളകുപൊടിയും അല്‍പ്പം വെള്ളത്തില്‍ കുതിര്‍ത്തു വെക്കൂ, ഓണ്‍ലൈനിലൂടെ മെസേജ്  പറന്നു, അങ്ങ് റാസ് അല്‍ ഖൈമയിലെ ബിജുവിന്റെ അടുക്കളയിലേക്ക്...


"ഓക്കേ , പൊടികള്‍ ഒക്കെ ഇതാ വെള്ളത്തില്‍ നനഞ്ഞു കുതിര്‍ന്നു... കൂടെ കൂട്ടുകാരന്‍ വിയര്‍ത്തും കുതിര്‍ന്നു ...." മറുകുറിയെത്തി.


"ഇനിയെന്താ ചെയ്യേണ്ടേ?"

ഇനിയെന്താ ചെയ്യേണ്ടേ, ഞാനും ഒരു നിമിഷം തല പുകച്ചു. പിന്നെ അന്വേഷിച്ചു,

"അവിടെ തേങ്ങാപ്പാല്‍ കിട്ടാന്‍ വഴിയുണ്ടോ ബിജൂ...?"

"ആ, കോക്കനട്ട് മില്‍ക്ക് പൌഡര്‍ ഉണ്ട്, അത് മതിയാകുമോ...?" ബിജു വേവലാതിയോടെ ചോദിച്ചു.

"ശരി, പൌഡറെങ്കില്‍ പൌഡര്‍ , അത് ഒരു കപ്പ്‌ വെള്ളത്തില്‍ കലക്കി നല്ല കട്ടിയുള്ള പാല്‍ ഉണ്ടാക്കൂ... പിന്നെ, രണ്ടോ മൂന്നോ ഏലക്കയും പൊടിച്ചു വെച്ചോളൂ..."


"കുഞ്ഞേച്ചീ, വേഗം പറയൂ... വിശന്നിട്ടു വയ്യ ", ബിജുവിന് ക്ഷമ നശിച്ചു തുടങ്ങിയോ...

"എങ്കില്‍ വേഗം ഒരു പാന്‍ അടുപ്പില്‍ വെക്കൂ, എണ്ണയൊഴിക്കൂ , ബാക്കിയുള്ള സവാളയും ഇഞ്ചിയും പച്ചമുളകും എല്ലാം കൂടി ഇട്ടു വഴറ്റൂ, വഴന്നു വരുമ്പോള്‍ കുതിര്‍ത്തു വച്ചിരിക്കുന്ന പൊടികള്‍ ചേര്‍ത്ത് നന്നായി മൊരിയിക്കൂ...  അതിലേക്കു വേവിച്ചു വച്ചിരിക്കുന്ന കടല ചേര്‍ത്ത് തിളപ്പിക്കൂ... എന്നിട്ട് ഏലക്കാപ്പൊടി ചേര്‍ത്ത തേങ്ങാപ്പാല്‍ ചേര്‍ത്ത് മിക്സ്‌ ചെയ്തു ഇറക്കി വച്ചിട്ട്, ഒന്നോ രണ്ടോ തണ്ട് കറിവേപ്പില പൊട്ടിചിട്ടോളൂ ട്ടോ... "


ഹോ, ഒറ്റശ്വാസത്തില്‍ പറഞ്ഞു നിര്‍ത്തി.അല്ല, ഒറ്റ സ്ട്രെച്ചില്‍ ടൈപ്പ് ചെയ്തു തീര്‍ത്തു....


ഏതാനും നിമിഷം അപ്പുറത്ത് നിന്നും മെസേജ് ഒന്നും കാണുന്നില്ല... എന്ത് പറ്റിയോ ആവോ എന്ന  ചിന്തയില്‍ ഇരിക്കുമ്പോള്‍ അതാ വരുന്നു ബിജുവിന്റെ മെസേജ്,


"നന്ദി കുഞ്ഞേച്ചീ, ഇനി ഓടിപ്പോയി കഴിക്കട്ടെ " , പറഞ്ഞതും ബിജു ഓഫ്‌ലൈന്‍ ആയതും ഇമ ചിമ്മുന്ന വേഗതയിലായിരുന്നു.
.......................................................


അടുത്ത ദിവസം,


എനിക്കൊരു ഓഫ്‌ ലൈന്‍ മെസേജ് കിട്ടി... " കടല സ്റ്റ്യൂ വളരെ നന്നായിരുന്നു, പക്ഷേ, ഇച്ചിരി ഉപ്പു കൂടിപ്പോയി എന്നു മാത്രം...! :) "

ഭാഗ്യം, എന്റെ പരീക്ഷണം വിജയകരമായി. ബിജുവും കൂട്ടുകാരും ഇപ്പോഴും ഇവിടെയൊക്കെയുണ്ട് . അതിനാല്‍ , നിങ്ങള്‍ക്കും ഈ കടല സ്റ്റ്യൂ പരീക്ഷിക്കാം.



പ്ലീസ് നോട്ട്: ബിജു ഫോട്ടോ തന്നില്ല... മൊബൈല്‍ കളഞ്ഞു പോയത് കൊണ്ടാണെന്ന് ന്യായീകരണം പറഞ്ഞത് കൊണ്ട്, ഗൂഗിളില്‍ നിന്നൊരണ്ണം അടിച്ചു മാറ്റി ഇവിടെ ചേര്‍ത്തു. 

ചെമ്മീന്‍ പുട്ട്

ചെമ്മീന്‍ പുട്ട് 

ചേരുവകൾ:

• വറുത്ത അരിപ്പൊടി - ഒരു കപ്പ്‌
• തേങ്ങപ്പീര - ഒരു കപ്പ്‌  
• ഉപ്പ് - പാകത്തിന് 
• വെള്ളം - പൊടി നനക്കാന്‍ ആവശ്യത്തിന്
• വൃത്തിയാക്കിയ ചെമ്മീന്‍ - അര കപ്പ്‌
•  സവാള  - ഒരെണ്ണം  
•  തക്കാളി   - ഒരെണ്ണം   
• വെളുത്തുള്ളി - മൂന്നോ നാലോ അല്ലി
• ഇഞ്ചി - ഒരിഞ്ചു നീളത്തില്‍ 
• പച്ചമുളക് - ഒന്ന്
•  മഞ്ഞള്‍പ്പൊടി - കാല്‍ ടീ സ്പൂണ്‍
• മുളകുപൊടി - അര ടീസ്പൂണ്‍ 
• ഗരം മസാല - അര ടീ സ്പൂണ്‍ 
• ഉപ്പ് - പാകത്തിന് 
• മല്ലിയില -  
• കറിവേപ്പില -  കുറച്ച് 
• എണ്ണ - രണ്ട് ടേബിള്‍ സ്പൂണ്‍ 

പാകം ചെയ്യുന്ന വിധം :

അരിപ്പൊടി തേങ്ങയും ഉപ്പും വെള്ളവും ചേര്‍ത്ത് പുട്ടിനു നനക്കുന്നത് പോലെ നനച്ചു വെക്കുക. അര മണിക്കൂര്‍ കഴിഞ്ഞു ഒന്നുകൂടി നന്നായി തിരുമ്മി യോജിപ്പിച്ചാല്‍ നല്ല മയവും സ്വാദും ഉണ്ടാവും. അതുകൊണ്ട് പൊടി നനച്ചു വെച്ചിട്ട് ചെമ്മീന്‍ തയ്യാറാക്കിയാല്‍ മതി.

സവാള, പച്ചമുളക്, വെളുത്തുള്ളി , ഇഞ്ചി, തക്കാളി എന്നിവ പൊടിയായി അരിഞ്ഞെടുക്കുക. ചീനച്ചട്ടി അടുപ്പത്ത് വെച്ച് ചൂടാകുമ്പോള്‍ എണ്ണയൊഴിക്കുക . ചൂടായ  എണ്ണയില്‍ അരിഞ്ഞു വച്ചിരിക്കുന്നവ ചേര്‍ത്ത് വഴന്നു വരുമ്പോള്‍ മസാലപ്പൊടികള്‍ ചേര്‍ത്ത് നന്നായി മൂപ്പിക്കുക. ശേഷം ചെമ്മീനും പാകത്തിന് ഉപ്പും വെള്ളവും ചേര്‍ത്ത് , മൂടി വെച്ച് വേവിക്കുക. ചെമ്മീന്‍ വെന്തു കഴിയുമ്പോള്‍ മൂടി തുറന്നു വച്ച് വെള്ളം വറ്റിച്ചെടുക്കുക .  മല്ലിയിലയും കറിവേപ്പിലയും ചേര്‍ത്ത് അല്‍പ്പസമയം അടച്ചു വെക്കുക. 

ഇനി പുട്ടുകുറ്റിയില്‍ നനച്ചു വെച്ചിരിക്കുന്ന അരിപ്പൊടി ഇടുക. പുട്ടിനു പീര പോലെ എന്ന പ്രയോഗം മാറ്റി , പുട്ടിനു ചെമ്മീന്‍ പോലെ എന്നാക്കിക്കോളൂ... എന്നിട്ട് ആവി കേറ്റി എടുത്തോളൂ, വേറെ കറിയൊന്നും വേണ്ട ഈ പുട്ടിന്...! 

പി.എസ് : ഇത് ഓരോരുത്തരുടെയും മനോധര്‍മമനുസരിച്ച് പല വിഭവങ്ങള്‍ കൊണ്ടും പരീക്ഷിക്കാം. ഞാന്‍ സാധാരണയായി ചെമ്മീന്‍ , മുട്ട, ചിക്കന്‍ , പലതരം പച്ചക്കറികള്‍ , പപ്പടം അങ്ങിനെ പലരീതിയിലും ഉണ്ടാക്കാറുണ്ട് . 

ചോറുവിഭവങ്ങള്‍ - (2)

1. ജീരക ചോറ് 

ആവശ്യമുള്ള സാധനങ്ങള്‍ : 

• അരി - ഒരു കപ്പ്‌(ബസ്മതിയോ പച്ചരിയോ ഉപയോഗിക്കാം) 

• വെള്ളം - രണ്ടു കപ്പ്‌ 

• ജീരകം - രണ്ടു ടീസ്പൂണ്‍ 

• ഏലക്ക - ഒരെണ്ണം 

• കുരുമുളക് - പത്തെണ്ണം   

• വഴനയില - രണ്ടെണ്ണം 

• എണ്ണ - രണ്ടു ടേബിള്‍ സ്പൂണ്‍  

• ഉപ്പ്‌ - പാകത്തിന്    

പാകം ചെയ്യുന്ന വിധം: 

അരി പതിനഞ്ചു മിനിറ്റ് വെള്ളത്തില്‍ കുതിര്‍ത്തു വെക്കുക.ശേഷം കഴുകി വാരി വെള്ളം തോരാന്‍ വെക്കുക. ഒരു ചുവടുകട്ടിയുള്ള പാത്രം അടുപ്പില്‍ വച്ച് ചൂടാകുമ്പോള്‍ എണ്ണ യൊഴിക്കുക. ചൂടായ എണ്ണയില്‍ വഴനയില, ഏലക്ക,കുരുമുളക്,ജീരകം എന്നിവ യഥാക്രമം ചേര്‍ക്കുക.അതിലേക്കു അരി ചേര്‍ത്ത് ഒന്ന് വഴറ്റി വെള്ളവും ഉപ്പും ചേര്‍ക്കുക.പാത്രം അടച്ചു വെച്ച് വേവിക്കുക. ഏകദേശം ഒരു പത്തു മിനിറ്റ് മതിയാകും അരി വെന്തു കിട്ടാന്‍ പരിപ്പ് കറി, അച്ചാര്‍ , പപ്പടം എന്നിവ കൂട്ടി കഴിക്കാം.

 2.കിച്ചടി  

ആവശ്യമുള്ള സാധനങ്ങള്‍ :

• അരി - രണ്ടു കപ്പ്‌

• തുവരപ്പരിപ്പ് - ഒരു കപ്പ്‌ 

• കരയാമ്പൂ - 4 എണ്ണം  

• കറുവപ്പട്ട - ഒരിഞ്ചു നീളത്തില്‍ ഒരു കഷണം 

• ഏലക്ക - 4  എണ്ണം 

• സവാള - രണ്ടെണ്ണം  

• തക്കാളി - നാലെണ്ണം 

• പച്ചമുളക് - രണ്ടെണ്ണം 

• മല്ലിയില - നാലോ അഞ്ചോ തണ്ട് 

• പുതിനയില - 8 - 10  

• കറിവേപ്പില - ഒരു തണ്ട്  

• വെളുത്തുള്ളി അരച്ചത്‌ - ഒരു ടീസ്പൂണ്‍  

• ഇഞ്ചി അരച്ചത്‌ - ഒരു ടീസ്പൂണ്‍  

• ഉപ്പ് - പാകത്തിന്  

• മഞ്ഞള്‍പ്പൊടി - ഒരു നുള്ള്  

• വെള്ളം - 3 കപ്പ്‌ 

• എണ്ണ - 3 ടേബിള്‍ സ്പൂണ്‍

പാകം ചെയ്യുന്ന വിധം:  

പരിപ്പ് കഴുകി മഞ്ഞള്‍പ്പൊടി ചേര്‍ത്ത് വേവിച്ചു വെക്കുക.  ചുവടു കട്ടിയുള്ള ഒരു പാത്രത്തില്‍ എണ്ണയൊഴിച്ച് ചൂടാകുമ്പോള്‍ കറുവപ്പട്ട, കരയാമ്പൂ, ഏലക്ക എന്നിവ പൊട്ടിക്കുക. തുടര്‍ന്ന് അരിഞ്ഞു വച്ചിരിക്കുന്ന സവാള ചേര്‍ത്ത് വഴറ്റുക. സവാള വഴന്നു വരുമ്പോള്‍ നെടുകെ നീളത്തില്‍ മുറിച്ച പച്ചമുളകും കറിവേപ്പിലയും പുതിനയിലയും കുറച്ചു മല്ലിയിലയും ചേര്‍ത്ത് ഒന്നുകൂടി വഴറ്റുക. അതിലേക്കു അരച്ച് വെച്ചിരിക്കുന്ന ഇഞ്ചിയും വെളുത്തുള്ളിയും ചേര്‍ത്ത് നന്നായി വഴറ്റി,അരിഞ്ഞു വച്ചിരിക്കുന്ന തക്കാളിയും ഉപ്പും ചേര്‍ക്കുക. കഴുകി വച്ചിരിക്കുന്ന അരിയും ചേര്‍ത്ത് ഒന്ന് കൂടി വഴറ്റി വെള്ളവും വേവിച്ചു വച്ചിരിക്കുന്ന പരിപ്പും ചേര്‍ത്ത് , ചെറിയ തീയില്‍ അടച്ചു വച്ച് വേവിക്കുക. ചൂടോടെ അച്ചാര്‍ , പപ്പടം എന്നിവ ചേര്‍ത്ത് വിളമ്പുക.അരി വേവിക്കുമ്പോള്‍ ഒന്നോ രണ്ടോ കഷണം എല്ലോടു കൂടിയ ചിക്കന്‍  അല്ലെങ്കില്‍ മട്ടണ്‍ ചേര്‍ത്താല്‍ നല്ല രുചിയുണ്ടാവും ...! 

ചോറ് വിവിധ രുചിയിലും എളുപ്പത്തിലും

1.   തേങ്ങാ സാദം 

ആവശ്യമുള്ളവ:

 

• പച്ചരി/ബസ്മതി അരി   - 2 കപ്പ്‌

• തേങ്ങ ചിരകിയത്  - അര കപ്പ്‌

• നെയ്യ് - 2 ടേബിള്‍ സ്പൂണ്‍

• ഉഴുന്നുപരിപ്പ് - അര ടീസ്പൂണ്‍

• കടുക് - കാല്‍ ടീസ്പൂണ്‍

• ഉണക്കമുളക് - രണ്ടെണ്ണം

• കറിവേപ്പില - ഒരു തണ്ട്

• ഉപ്പ് - പാകത്തിന്

• കായപ്പൊടി - രണ്ടു നുള്ള്

തയ്യാറാക്കുന്ന വിധം: 

 അരി പാകത്തിന് ഉപ്പ് ചേര്‍ത്ത് വേവിച്ചു വെക്കുക. ഒരു ചുവടുകട്ടിയുള്ള പാത്രം അടുപ്പത്ത് വച്ച് ചൂടാകുമ്പോള്‍ നെയ്യൊഴിക്കുക. കടുക്, ഉഴുന്ന്, ഉണക്കമുളക്, കറിവേപ്പില, കായപ്പൊടി എന്നിവ യഥാക്രമം വഴറ്റുക. അതിലേക്കു തേങ്ങ ചേര്‍ത്ത് നിറം പോകാതെ വറുക്കുക.  വേവിച്ചു വച്ചിരിക്കുന്ന ചോറും ചേര്‍ത്ത് നന്നായി യോജിപ്പിച്ച് വാങ്ങുക. ചൂടോടെ അച്ചാര്‍ , പപ്പടം എന്നിവ ചേര്‍ത്ത് കഴിക്കാം.

  പിന്കുറിപ്പ് : വറുത്ത നിലക്കടല,കശുവണ്ടി, ഗ്രീന്‍പീസ് തുടങ്ങിയവയും ചേര്‍ക്കാവുന്നതാണ്.

2 .തൈര് സാദം

ആവശ്യമുള്ളവ:

• വേവിച്ച ചോറ്  - 2 കപ്പ്‌  

• അധികം പുളിക്കാത്ത തൈര് - ഒരു കപ്പ്‌

• പാല്‍ - കാല്‍ കപ്പ്‌

• പച്ചമുളക് -രണ്ടെണ്ണം(ചെറുതായി വട്ടത്തില്‍ അരിഞ്ഞെടുക്കുക)

• ചെറിയ ഉള്ളി - മൂന്നോ നാലോ (ചെറുതായി അരിഞ്ഞെടുക്കുക) 

• ഇഞ്ചി - ഒരു ചെറിയ കഷണം (ചെറുതായി കൊത്തിയരിയുക)

• കടലപ്പരിപ്പ് - ഒരു ടീസ്പൂണ്‍ 

• ഉഴുന്ന് - ഒരു ടീസ്പൂണ്‍ 

• കടുക് - അര ടീസ്പൂണ്‍ 

• കറിവേപ്പില - ഒരു തണ്ട് 

• ഉപ്പ് - പാകത്തിന് 

• എണ്ണ - 2 ടേബിള്‍സ്പൂണ്‍
  

തയ്യാറാക്കുന്ന വിധം:

ചീനച്ചട്ടി അടുപ്പില്‍ വെച്ച് ചൂടാകുമ്പോള്‍ എണ്ണയൊഴിക്കുക. എണ്ണ ചൂടാകുമ്പോള്‍ കടുക്, ഉഴുന്ന്, കടലപ്പരിപ്പ് , ഉണക്കമുളക്, കറിവേപ്പില എന്നിവ യഥാക്രമം വറുക്കുക. അതിലേക്കു അരിഞ്ഞു വെച്ചിരിക്കുന്ന ഉള്ളി, പച്ചമുളക്, ഇഞ്ചി എന്നിവ ചേര്‍ത്ത് നന്നായി വഴറ്റുക. അടുപ്പത്ത്‌ നിന്നും ഇറക്കി വച്ചതിനു ശേഷം വേവിച്ചു വച്ചിരിക്കുന്ന ചോറും, തൈരും പാലും ഉപ്പും ചേര്‍ത്ത് നന്നായി ഇളക്കി യോജിപ്പിക്കുക. ചൂടോടെയോ തണുപ്പിച്ചോ അച്ചാര്‍ , പപ്പടം എന്നിവ ചേര്‍ത്ത് കഴിക്കാം.

                                                                                                                                                     

സ്നാക്ക്സ് വിഭവങ്ങള്‍

1. ഉരുളക്കിഴങ്ങ് ബോണ്ട
വേണ്ട സാധനങ്ങള്‍ :

• വേവിച്ചു ഉടച്ചെടുത്ത ഉരുളക്കിഴങ്ങ് - രണ്ടെണ്ണം 
• ചെറുതായി നുറുക്കിയ സവാള - ഒരെണ്ണം
•  ചെറുതായി നുറുക്കിയ പച്ചമുളക് - ഒന്നോ രണ്ടോ (എരിവു അനുസരിച്ച് )
• ചെറുതായി നുറുക്കിയ മല്ലിയില - രണ്ടോ മൂന്നോ തണ്ട് 
• മുളകുപൊടി - 1/4 ടീസ്പൂണ്‍ 
• മഞ്ഞള്‍പ്പൊടി - 1/4 ടീസ്പൂണ്‍
• ഗരംമസാലപ്പൊടി -  1/4 ടീസ്പൂണ്‍ 
• കടലമാവ് - ഒരു കപ്പ്‌ 
• ഉപ്പ് - ആവശ്യത്തിന്‌
• എണ്ണ - വറുക്കാന്‍ ആവശ്യത്തിന്‌ 

തയ്യാറാക്കുന്ന വിധം:

വേവിച്ചു ഉടച്ച ഉരുളക്കിഴങ്ങിലേക്ക് സവാള, പച്ചമുളക്,മല്ലിയില,അല്പം മുളകുപൊടി,ഗരംമസാലപ്പൊടി,ഉപ്പ് എന്നിവ ചേര്‍ത്തു നന്നായി യോജിപ്പിക്കുക.

മറ്റൊരു പാത്രത്തില്‍ കടലമാവ് , ഉപ്പ്, മഞ്ഞള്‍പ്പൊടി,അല്പം മുളകുപൊടി എന്നിവയെടുത്തു കുറച്ചു വെള്ളവും ചേര്‍ത്തു, കുഴമ്പു പരുവത്തില്‍ മിശ്രിതം(ബാറ്റര്‍ ) ഉണ്ടാക്കുക.

ഉരുളക്കിഴങ്ങ് മിശ്രിതത്തില്‍ നിന്നും ചെറിയ ഉരുളകള്‍ ഉണ്ടാക്കിയെടുത്ത്, ബാറ്ററില്‍ മുക്കി ചൂടായ എണ്ണയില്‍ ഇട്ടു ഗോള്‍ഡന്‍ ബ്രൌണ്‍ നിറത്തില്‍ വറുത്തു കോരിയെടുക്കുക.

ചൂടോടെ ചട്നി കൂട്ടിയോ അല്ലാതെയോ വിളമ്പാവുന്നതാണ്.   


2 .ബ്രെഡ്‌ റോള്‍സ് 
വേണ്ട സാധനങ്ങള്‍ :

• വേവിച്ചു ഉടച്ചെടുത്ത ഉരുളക്കിഴങ്ങ് ,കാരറ്റ് - ഒരു കപ്പ്‌
• വേവിച്ച പട്ടാണി പയര്‍ (ഗ്രീന്‍പീസ്) - കാല്‍ കപ്പ്‌
• ചെറുതായി നുറുക്കിയ സവാള - ഒരെണ്ണം
• ചെറുതായി നുറുക്കിയ പച്ചമുളക് - രണ്ടെണ്ണം
• ചെറുതായി നുറുക്കിയ മല്ലിയില - രണ്ടോ മൂന്നോ തണ്ട്
• മുളകുപൊടി - കാല്‍ ടീസ്പൂണ്‍
• ഗരംമസാലപ്പൊടി - കാല്‍ ടീസ്പൂണ്‍ 
• ഉപ്പ് - പാകത്തിന് 
• ബ്രെഡ്‌ കഷണങ്ങള്‍ - 8 - 10 എണ്ണം 
• എണ്ണ - വറുക്കാന്‍ ആവശ്യത്തിന്‌ 

 തയ്യാറാക്കുന്ന വിധം:

ബ്രെഡ്‌ ഒഴിച്ചുള്ള ചേരുവകള്‍ എല്ലാം ഒന്നിച്ചാക്കി യോജിപ്പിക്കുക.

ഒരു പാത്രത്തില്‍ അല്പം വെള്ളമെടുത്തു , ഓരോ ബ്രെഡ്‌ കഷണങ്ങളും അതില്‍ മുക്കി നന്നായി പിഴിഞ്ഞെടുക്കുക. ബ്രെഡ് കുതിര്‍ന്ന് കിട്ടാന്‍ വേണ്ടിയാണു അങ്ങിനെ ചെയ്യുന്നത്.

ഓരോ സ്പൂണ്‍ ഉരുളക്കിഴങ്ങ് മിശ്രിതം എടുത്തു ഓരോ ബ്രെഡ്‌ കഷണത്തിലും വെച്ച് റോള്‍ ചെയ്തു എടുത്തു അരികുകള്‍ വിരലുകള്‍ കൊണ്ടമര്‍ത്തി ഒട്ടിക്കുക.

നല്ലവണ്ണം ചൂടായ എണ്ണയില്‍ റോളുകള്‍ ഇട്ടു തീ അല്പം കുറച്ചു വച്ചു വറുത്തെടുക്കുക.

ചൂടോടെ ചട്നി, സോസ് എന്നിവ കൂട്ടി കഴിക്കാവുന്നതാണ്.

കുറിപ്പ്: ഉരുളക്കിഴങ്ങ് മിശ്രിതത്തിനു പകരം,ചിക്കന്‍,ബീഫ്,ചെമ്മീന്‍ തുടങ്ങി  അധികം വന്ന മെഴുക്കുപുരട്ടിയും തോരനും വരെ ഇതില്‍ ഫി‌ല്ലിങ്ങായി  ഉപയോഗിക്കാവുന്നതാണ്.

തൈരു വിഭവങ്ങള്‍

എളുപ്പത്തില്‍ ഉണ്ടാക്കാവുന്ന ചില തൈരു വിഭവങ്ങള്‍....

1 . പച്ചടി

ആവശ്യമുള്ള സാധനങ്ങള്‍

1 . കാരറ്റ് ചീകിയത് - ഒരു കപ്പ്‌
2 . സവാള ചെറുതായി അരിഞ്ഞത് - ഒരു കപ്പ്‌
3 . പച്ചമുളക് ചെറുതായി അരിഞ്ഞത് - രണ്ടോ മൂന്നോ
4 . തൈര്‍ - ഒരു കപ്പ്‌
5 . ഉപ്പ് - പാകത്തിന്
വറുത്തിടാന്‍ കടുക്, ഉണക്കമുളക്,കറിവേപ്പില എന്നിവയും വേണം.

ഉണ്ടാക്കുന്ന വിധം

ഒന്ന് മുതല്‍ അഞ്ചു വരെയുള്ള ചേരുവകള്‍ ഒന്നിച്ചാക്കി നന്നായി മിക്സ്‌ ചെയ്യുക. അതിലേക്കു കടുക്, ഉണക്കമുളക്,കറിവേപ്പില എന്നിവ വറുത്തിടുക.

കുറിപ്പ് : കാരറ്റിനു പകരം ബീട്രൂറ്റ്,മുള്ളങ്കി,വാഴപ്പിണ്ടി മുതലായവും ഉപയോഗിക്കാവുന്നതാണ്.

2 . തൈരു കറി

ആവശ്യമുള്ള സാധനങ്ങള്‍

1 . തൈര്‍ - ഒരു കപ്പ്‌
2 . സവാള പൊടിയായി കൊത്തിയരിഞ്ഞത്‌ - ഒരെണ്ണം
3 . പച്ചമുളക് ചെറുതായി അരിഞ്ഞത് - മൂന്നോ നാലോ
4 . ഇഞ്ചി പൊടിയായി അരിഞ്ഞത് - ഒരിഞ്ചു നീളത്തിലെ ഒരു കഷണം
5 . വെളുത്തുള്ളി പൊടിയായി അരിഞ്ഞത് - ഒന്നോ രണ്ടോ
6 . തക്കാളി ചെറുതായി അരിഞ്ഞത് - ഒരെണ്ണം
7 . മഞ്ഞള്‍പ്പൊടി - 1/4 സ്പൂണ്‍
8 . മുളകുപൊടി - 1/2 സ്പൂണ്‍
9 . ഉപ്പ് - പാകത്തിന്
10 . വെള്ളം - അര കപ്പ്‌
11 . പാചകയെണ്ണ - 1 ടേബിള്‍സ്പൂണ്‍ 
12 . കടുക് -  1/4 സ്പൂണ്‍      

ഉണ്ടാക്കുന്ന വിധം

ചൂടായ ചട്ടിയില്‍ എണ്ണയൊഴിച്ച് കടുക് ഇടുക.കടുക് പൊട്ടിയാലുടന്‍, അരിഞ്ഞു വച്ചിരിക്കുന്ന സവാള, പച്ചമുളക്, ഇഞ്ചി , വെളുത്തുള്ളി, തക്കാളി എന്നിവ ചേര്‍ത്ത് വഴറ്റുക. നന്നായി വഴന്നാലുടന്‍ മഞ്ഞള്‍പ്പൊടിയും മുളകുപൊടിയും ചേര്‍ത്ത് വീണ്ടും വഴറ്റുക. അതിലേക്കു വെള്ളം ഒഴിച്ച് ഉപ്പും ചേര്‍ക്കുക. തിളച്ചു കഴിയുമ്പോള്‍ ഇറക്കി വച്ച് ഒന്ന് തണുത്തതിനു ശേഷം തൈര്‍ ചേര്‍ത്ത് നന്നായി ഇളക്കി യോജിപ്പിക്കുക.

(ശ്രദ്ധിക്കുക: തിളച്ച ചൂടോടെ തൈര്‍ ചേര്‍ത്താല്‍ പിരിഞ്ഞു പോകും.)

ബാച്ചിലേര്‍സ് കോര്‍ണര്‍ - തുടര്‍ച്ച

മാങ്ങച്ചമ്മന്തി

 ചേരുവകള്‍
പച്ചമാങ്ങ - 2
ഉള്ളി - അര കപ്പ്‌
മുളകുപൊടി - 1/2 സ്പൂണ്‍
ഉപ്പ് - പാകത്തിന്
വെളിച്ചെണ്ണ - ഒരു സ്പൂണ്‍

പാകം ചെയ്യുന്ന വിധം

വെളിച്ചെണ്ണയൊഴിച്ചുള്ള  ചേരുവകള്‍ എല്ലാം കൂടെ മിക്സിയിലോ അമ്മിയിലോ നന്നായി അരക്കുക.വെളിച്ചെണ്ണയും ചേര്‍ത്ത് നന്നായി മിക്സ്‌ ചെയ്യുക.

നാരങ്ങ ഉപ്പിലിട്ടത്‌
ചേരുവകള്‍
ചെറുനാരങ്ങ - 10, 15
തിളപ്പിച്ചാറ്റിയ വെള്ളം - ആവശ്യത്തിന്
ഉപ്പ് - പാകത്തിന്

പാകം ചെയ്യുന്ന വിധം

ഒരു കുപ്പിയിലോ ഭരണിയിലോ കഴുകി തുടച്ച ചെറുനാരങ്ങ ഇട്ടുവെക്കുക.  തിളപ്പിച്ചാറ്റിയ വെള്ളം ഉപ്പും ചേര്‍ത്ത്,  നികക്കെ ഒഴിക്കുക. രണ്ടാഴ്ചക്കു ശേഷം നാരങ്ങ ഉപയോഗിക്കാം.

ഒരു നാരങ്ങയും കുറച്ചു ഉള്ളി അരിഞ്ഞതും അല്പം വെളിച്ചെണ്ണയും മുളകുപൊടിയോ കാന്താരി മുളകോ ചേര്‍ത്ത് നന്നായി ഞെരടി ഉപയോഗിക്കാവുന്നതാണ്.

വാല്‍കഷണം: നാരങ്ങ പിഴിഞ്ഞ തൊണ്ട് കളയാതെയും ഇപ്രകാരം ഉപ്പിലിട്ടു വച്ച് ഉപയോഗിക്കാം.അതിനായി, ഒരു കുപ്പിയിലോ ഭരണിയിലോ തിളപ്പിച്ചാറ്റിയ വെള്ളം ഉപ്പും ചേര്‍ത്തു പാതി നിറക്കുക. ഓരോ തവണയും നാരങ്ങ പിഴിഞ്ഞതിനു ശേഷം  തൊണ്ട് ഇതിലേക്ക് ഇട്ടു വെക്കാം. ഒന്ന് രണ്ടാഴ്ച കൊണ്ട് പാകമായി കിട്ടും.

എളുപ്പത്തില്‍ ഉപ്പുമാങ്ങ ഉണ്ടാക്കാം

മാങ്ങ കൂടുതല്‍ കിട്ടുമ്പോള്‍ വാങ്ങി കഴുകി, ഒരു വലിയ പാത്രത്തില്‍ മാങ്ങയും വെള്ളവും ഉപ്പും ചേര്‍ത്തു തിളപ്പിക്കുക. മാങ്ങ വെന്തു വരുമ്പോള്‍ ഇറക്കി വച്ച്,തണുക്കുമ്പോള്‍ കുപ്പിയിലോ ഭരണിയിലോ ഇട്ടു വെക്കാം.കുറെനാള്‍ കേടാകാതെ ഇരിക്കും. ആവശ്യത്തിന് ഓരോന്ന് എടുത്തുപയോഗിക്കാം.

മാങ്ങയും ഉള്ളിയും മുളകുപൊടി അല്ലെങ്കില്‍ കാന്താരിമുളകും വെളിച്ചെണ്ണയും ചേര്‍ത്തു ഞെരടി എടുത്താല്‍ ചോറിനു വേറെ കറി വേണ്ട.

പയറുദോശ

ചെറുപയര്‍ 4 മണിക്കൂര്‍ വെള്ളത്തിലിട്ടു കുതിര്‍ത്തതിനുശേഷം  മുളപ്പിക്കാന്‍ വെക്കുക.പിറ്റേന്നാകുമ്പോള്‍ നന്നായി മുള വന്നിരിക്കും. മുളപ്പിച്ച ചെറുപയര്‍ വളരെ പോഷകഗുണമുള്ളതാണ്‌.

ആവശ്യമുള്ള സാധനങ്ങള്‍

മുളപ്പിച്ച ചെറുപയര്‍  - ഒരു കപ്പ്‌
അരിപ്പൊടി                - ഒരു കപ്പ്‌
കാരറ്റ് ചീകിയത്       - അര കപ്പ്‌
സവാള പൊടിയായി കൊത്തിയരിഞ്ഞത്‌ - അര കപ്പ്‌

പച്ചമുളക് പൊടിയായി കൊത്തിയരിഞ്ഞത്‌ - 3,4 (ആവശ്യാനുസരണം എണ്ണം കൂട്ടുകയോ കുറയ്ക്കുകയോ ചെയ്യാം)

മല്ലിയില പൊടിയായി കൊത്തിയരിഞ്ഞത്‌ - അര കപ്പ്‌
മഞ്ഞള്‍പ്പൊടി      -  അര ടീസ്പൂണ്‍
ഉപ്പ്‌       - പാകത്തിന്


  പാകം ചെയ്യുന്ന വിധം 

• മുളപ്പിച്ച ചെറുപയര്‍ വെള്ളവും ചേര്‍ത്ത് മിക്സിയില്‍  അരച്ചെടുക്കുക.

• മറ്റു ചേരുവകളും, ആവശ്യാനുസരണം വെള്ളവും  ചേര്‍ത്ത് നന്നായി യോജിപ്പിക്കുക.

• ദോശ മാവിനേക്കാള്‍ അല്പം കട്ടിയില്‍ കലക്കിയെടുക്കുക.

• ചൂടാക്കിയ ദോശക്കല്ലിലോ നോണ്‍സ്റ്റിക്ക്  തവയിലോ മാവു കോരിയൊഴിച്ച്  നെയ്യ്  ചേര്‍ത്ത് തിരിച്ചു മറിച്ചും ഇട്ടു ദോശ ചുട്ടെടുക്കുക.

• ചൂടോടെ സാമ്പാര്‍ , തേങ്ങാച്ചമ്മന്തി എന്നിവ കൂട്ടിയും  കഴിക്കാവുന്നതാണ്.  
  

തേങ്ങാച്ചമ്മന്തി

തേങ്ങ   - അരമുറി
പൊട്ടുകടല  - അര  കപ്പ്‌
പച്ചമുളക് - 2,3
ഇഞ്ചി - ഒരു കുഞ്ഞുകഷണം
വെളുത്തുള്ളി - 1
ചെറിയ ഉള്ളി  - 5
കറിവേപ്പില  - ഒരു തണ്ട്
ഉപ്പ്‌    - പാകത്തിന്

ആദ്യം പൊട്ടുകടല മിക്സിയില്‍ തരിയായി പൊടിച്ചെടുക്കുക.പിന്നീടു മറ്റു ചേരുവകളും ചേര്‍ത്ത് നന്നായി അരക്കുക. അരക്കുമ്പോള്‍, അല്പം വെള്ളം ചേര്‍ത്തരക്കുക. ഈ ചമ്മന്തി, കടുക് വറുത്തും അല്ലാതെയും ഉപയോഗിക്കാം.