Tuesday, March 4, 2014

ടൊമാറ്റോ സോസ് വീട്ടിലുണ്ടാക്കാം



അവധി ദിവസത്തിന്റെ ആലസ്യത്തിൽ മടി പിടിച്ചിരിക്കുമ്പോഴാണ് ആലു ടിക്കി ഉണ്ടാക്കിയാലോ എന്നു മോൾ ചോദിക്കുന്നത്. വായനയുടെ ഗൗരവത്തിൽ ആണെന്നു ധരിച്ചോട്ടെയെന്ന് മനസ്സിൽ പറഞ്ഞു കൊണ്ട്,   കേൾക്കാത്ത ഭാവത്തിൽ കയ്യിലിരുന്ന പുസ്തകത്തിലേക്ക് കണ്ണും നട്ടിരുന്നു.  പക്ഷേ, അവൾ വിടുന്ന മട്ടില്ല.... ഹോ, അമ്മ അന്നുണ്ടാക്കിയ ആലു ടിക്കിയുടെ സ്വാദ് , കൂട്ടുകാർ അതെക്കുറിച്ച് വർണിച്ചത് .... എന്നൊക്കെ പറഞ്ഞു കൊണ്ടിരുന്നു. അറ്റകൈക്ക് 'ഞാനൂടെ സഹായിക്കാം അമ്മാ...' എന്ന് പറഞ്ഞ്   എന്നിലെ അമ്മയെ സെന്റിയാക്കി ....  

പിന്നെ, രണ്ടു പേരും കൂടെ കിച്ചണിലേക്ക് .... ഫ്രിഡ്ജ് തുറന്നു പിടിച്ചു കുറച്ചു നേരം വെജിറ്റബിൾ ട്രേയിലേക്ക് തുറിച്ചു നോക്കി.... നോട്ടം ഭയന്നിട്ട് ഉരുളക്കിഴങ്ങും പച്ചമുളകും എല്ലാം തക്കാളിയുടെ പിന്നിൽ ഒളിക്കാനൊരു ശ്രമം. എന്നെ ആരും തൊടില്ലയെന്ന് തക്കാളിയിങ്ങിനെ അഹങ്കാരത്താൽ ചുവന്നു തുടുത്ത് തലയുയർത്തിപ്പിടിച്ച് എന്നെയൊന്നു നോക്കി.  അപ്പോഴാണ്‌ ആലു ടിക്കിയെ മുക്കിയെടുക്കാനുള്ള സോസ് കുപ്പിയുടെ ദയനീയ നോട്ടം  ശ്രദ്ധയിൽ പെട്ടത്. 



പിന്നെയൊന്നും ആലോചിച്ചില്ല, അഹങ്കാരിയായ തക്കാളിയെ തന്നെ ആദ്യം പിടി കൂടി. വെള്ളത്തിലിട്ട് ആ അഹങ്കാരിയെ കുളിപ്പിച്ചെടുക്കാൻ മോളെ ഏൽപ്പിച്ചു. ഏകദേശം ഒരു കിലോയോളം ഉണ്ടായിരുന്നു .  കുക്കറിൽ വെച്ച് ഒരു നെലോളി പുറത്തേക്ക് വരുന്നതു വരെ അടുപ്പിൽ വെച്ച് കത്തിച്ചു . ചൂടൊന്ന് ആറിയപ്പോൾ എടുത്ത് അരിപ്പയിൽ വെച്ച് നല്ല വണ്ണം തേച്ച് , അരിച്ചെടുത്തു.


എന്നിട്ട് ഒരു ചീനച്ചട്ടിയിലാക്കി വീണ്ടും അടുപ്പത്തു വെച്ചു. ഇത്തവണ കൂട്ടിനു ഒരു ടേബിൾ സ്പൂണ്‍ മുളകുപൊടിയും ഒന്നരക്കപ്പ് പഞ്ചസാരയും അരക്കപ്പ് വിനാഗിരിയും ഓരോ ടീസ്പൂണ്‍ ഇഞ്ചിയും വെളുത്തുള്ളിയും അരച്ചതും  ഉപ്പും എല്ലാം  ഉണ്ടായിരുന്നതു കൊണ്ട് തക്കാളിയുടെ അഹങ്കാരത്തിന് ചെറിയ ശമനമുണ്ടായിരുന്നു. അഞ്ചു കരയാമ്പൂവും രണ്ടു കറുവാപ്പട്ടയും കൂടെ ഒരു കിഴി കെട്ടി അതിലേക്ക് ഇട്ടു വെച്ചു. നന്നായി തിളച്ചു കുറുകി വന്നപ്പോൾ കിഴിയെടുത്ത് മാറ്റി. കുറച്ചെടുത്ത് രുചിച്ചു നോക്കിയിട്ട് ഉം, കൊള്ളാം എന്ന് മോൾ തലകുലുക്കി.....



പിന്നെ, തണുത്തു കഴിഞ്ഞപ്പോ സോസിനെ കുപ്പിയിലാക്കി ഭദ്രമായി പൂട്ടി വെച്ചു.


Related Posts Plugin for WordPress, Blogger...