Monday, September 22, 2014

രുചിക്കൂട്ട് - കൂട്ടായ്മയുടെ രുചി



രുചികരമായി പാചകം ചെയ്യാൻ ശ്രമിക്കുന്ന ഏവർക്കും ഒരു സഹായി എന്ന നിലയിൽ , എളുപ്പത്തിലും ലളിതമായും തയ്യാറാക്കാവുന്ന പാചകക്കുറിപ്പുകളാണ് കൊച്ചുമോൾ കൊട്ടാരക്കരയും കുഞ്ഞൂസ് കാനഡയും ചേർന്ന് തയ്യാറാക്കി, കൊച്ചിയിലെ പീലി ബുക്ക്സ് പ്രസിദ്ധീകരിച്ച 'രുചിക്കൂട്ട്'  ....

മനസ്സിൽ നന്മ സൂക്ഷിക്കുന്ന ഒരു കൂട്ടം സുഹൃത്തുക്കൾ ഒത്തുചേർന്ന് രൂപം കൊടുത്ത ഒരു ജീവകാരുണ്യദൗത്യം കൂടിയാണ് ഈ സംരംഭം. ഇതിന്റെ മുഴുവൻ വരുമാനവും ദുരിതബാധിതർക്കു വേണ്ടിയുള്ളതാണ്. സുമനസ്സുകളുടെ സജീവ പങ്കാളിത്തത്തിലൂടെ ചേർത്തിണക്കിയ മാനവികതയുടെ ഈ സ്നേഹവിഭവം ഏവർക്കും ആസ്വദിക്കാനാവുമെന്നതിന് സംശയമില്ല.



2014 ഫെബ്രുവരി 27 ന് തിരുവനന്തപുരത്ത് നടന്ന ബ്ലോഗ്ഗർ സംഗമത്തിൽ വെച്ച് കേരള വനിതാവികസന കോർപ്പറേഷൻ എം.ഡി ശ്രീ. സുനീഷ് 'രുചിക്കൂട്ട് ' പ്രകാശനം ചെയ്യുകയുണ്ടായി. സുപ്രസിദ്ധ ബ്ലോഗറും റിട്ടയേർഡ് ചീഫ്  മജിസ്ട്രേറ്റുമായ ശ്രീ. ഷെരീഫ് കൊട്ടാരക്കരയാണ് പുസ്തകം ഏറ്റുവാങ്ങിയത്.

പുസ്തകത്തിന്റെ മുഖവില 100 രൂപയാണ്. താഴെ കാണുന്ന അക്കൗണ്ട് നമ്പറിൽ പണമടച്ച് അൻവർ ഹുസ്സൈനുമായി ബന്ധപ്പെട്ടാൽ പുസ്തകം ലഭിക്കുന്നതാണ്.

ANWAR HUSSAIN H
SYSTEM ANALYST
KERALA PUBLIC SERVICE COMMISSION
THULASI HILL
PATTOM PALACE P.O
THIRUVANANTHAPURAM - 695 004
Ph: 9447024339

A/c No: 2791101010153
ANWAR HUSSAIN H
IFSC Code: CNRB0002791
CANARA BANK, PATTOM, TVM 



കുവൈറ്റിലും പരിസരപ്രദേശങ്ങളിലും ഉള്ളവർ ഈ ഫോണ്‍ നമ്പറിൽ വിളിച്ചാൽ മതി.

ദുബായിൽ പ്രഭൻകൃഷ്ണൻ, സമീരൻ അലി എന്നിവരേയും ഖത്തറിൽ മജീദ്‌ നാദാപുരം , നാമൂസ്, ഷാഹിദ ജലീൽ എന്നിവരേയും സൗദിയിൽ അജ്മത് , കൊമ്പൻ മൂസ (00966540406133) എന്നിവരേയും പുസ്തകത്തിനായി ബന്ധപ്പെടാവുന്നതാണ്. ജിദ്ദയിൽ എവിടെയാണെങ്കിലും എത്തിച്ചു തരുന്നതായിരിക്കും.

എല്ലാ നന്മ മനസ്സുകളുടെയും സ്നേഹപങ്കാളിത്തം പ്രതീക്ഷിക്കുന്നു...!





Tuesday, May 6, 2014

മത്തി(ചാള) വിവിധ രീതിയിൽ

 
നമ്മുടെ നാട്ടിൽ സുലഭമായ മത്തി വിറ്റാമിനുകളാലും മിനറലുകളാലും സമ്പുഷ്ടമാണ്. വിറ്റമിൻ ബി, ബി 12 എന്നിവയുടെ ഉറവിടമായ മത്തിയുടെ   ഉപയോഗം  നാഡിവ്യൂഹത്തിന്റെ പ്രവർത്തനങ്ങളെ   സഹായിക്കാൻ ഉതകുന്നു.  ഇതിൽ അടങ്ങിയിരിക്കുന്ന ഒമേഗ 3 ഫാറ്റി ആസിഡ് ഹൃദ്രോഗം, അൽഷിമേഴ്സ് തുടങ്ങിയവയെ പ്രതിരോധിക്കാൻ സഹായിക്കുന്നു.  ഫോസ്ഫറസ്, പൊട്ടാസ്യം, പ്രോടീൻ, കാത്സ്യം, വിറ്റമിൻ ഡി എന്നിവയാലും സമ്പുഷ്ടമായ മത്തി നിത്യാഹാരത്തിൽ ഉൾപ്പെടുത്തുന്നത് നല്ലതാണ്.   

 മത്തി പൊള്ളിച്ചത് 




ചേരുവകൾ: 
  • മത്തി വൃത്തിയാക്കിയത് - അരക്കിലോ 
  • ഉള്ളി അരിഞ്ഞത് - അരക്കപ്പ് 
  • പച്ചമുളക് വട്ടത്തിൽ അരിഞ്ഞത് - ഒരു ടേബിൾ സ്പൂണ്‍ 
  • ഇഞ്ചി ചെറുതായി അരിഞ്ഞത് - ഒരു ടീസ്പൂണ്‍ 
  • വെളുത്തുള്ളി ചെറുതായി അരിഞ്ഞത് -  ഒരു ടീസ്പൂണ്‍ 
  • കറിവേപ്പില - രണ്ടു തണ്ട് 
  • മഞ്ഞൾപ്പൊടി - അര ടീസ്പൂണ്‍ 
  • മുളകുപൊടി - ഒരു ടേബിൾസ്പൂണ്‍ 
  • ഉപ്പ് - പാകത്തിന് 
  • കട്ടിയുള്ള തേങ്ങാപ്പാൽ - അരക്കപ്പ് 
  • വെളിച്ചെണ്ണ - ഒരു ടേബിൾസ്പൂണ്‍ 


പാകം ചെയ്യുന്ന വിധം:

അരിഞ്ഞു വെച്ചിരിക്കുന്ന ഉള്ളി, പച്ചമുളക്, ഇഞ്ചി, വെളുത്തുള്ളി , ഒരു തണ്ട് കറിവേപ്പില എന്നിവ ഉപ്പും കാൽ സ്പൂണ്‍ വെളിച്ചെണ്ണയും ചേർത്ത് നന്നായി ഞെരടിത്തിരുമ്മി വെക്കുക. ഒരു ചീനച്ചട്ടി അടുപ്പിൽ വെച്ച് ബാക്കിയുള്ള വെളിച്ചെണ്ണ ഒഴിച്ച്  ചൂടാകുമ്പോൾ തിരുമ്മി വെച്ചിരിക്കുന്ന ചേരുവകൾ നന്നായി വഴറ്റുക. അതിലേക്ക് മഞ്ഞൾപ്പൊടിയും മുളകുപൊടിയും ചേർത്ത് വീണ്ടും വഴറ്റുക. ശേഷം വൃത്തിയാക്കി വെച്ചിരിക്കുന്ന മത്തിയും തേങ്ങാപ്പാലും ചേർക്കുക. ചെറിയ തീയിൽ വേവിച്ചെടുക്കുക. തേങ്ങാപ്പാലിലെ എണ്ണ തെളിഞ്ഞു വറ്റണം. മസാല മീനിൽ പൊതിഞ്ഞിരിക്കണം. അടുപ്പിൽ നിന്നിറക്കി ബാക്കി കറിവേപ്പില മീതെയിട്ട് കുറച്ചു നേരം അടച്ചു വെച്ചതിനു ശേഷം ഉപയോഗിക്കാം.


മത്തി കട്ട്ലറ്റ് 


ചേരുവകൾ: 
  • വൃത്തിയാക്കിയ മത്തി - അരക്കിലോ 
  • തേങ്ങ ചിരകിയത് - അരക്കപ്പ്‌
  • ഉള്ളി - കാൽക്കപ്പ് 
  • പച്ചമുളക് - എട്ടെണ്ണം 
  • ഇഞ്ചി - ഒരു ചെറിയ കഷണം 
  • കറിവേപ്പില - ഒരു തണ്ട് 
  • മഞ്ഞൾപ്പൊടി - കാൽ ടീസ്പൂണ്‍ 
  • ഉപ്പ് - പാകത്തിന്  
  • വെളിച്ചെണ്ണ - വറുക്കാൻ ആവശ്യത്തിന് 
പാകം ചെയ്യുന്ന വിധം:

വൃത്തിയാക്കിയ മത്തിയുടെ നടുവിലുള്ള മുള്ള് എടുത്തു കളയുക. ബാക്കി ചേരുവകളും ചേർത്ത് മിക്സിയിൽ തരുതരുപ്പായി അരയ്ക്കുക. ഒരു പാത്രത്തിൽ ഇട്ട് നന്നായി യോജിപ്പിച്ചതിനു ശേഷം ഓരോ ഉരുളകളായി എടുത്ത് കട്ട്ലറ്റ് രൂപത്തിലാക്കി ചൂടായ വെളിച്ചെണ്ണയിൽ വറുത്തെടുക്കുക . 



മത്തിക്കറി


ചേരുവകൾ: 
  • വൃത്തിയാക്കിയ മത്തി - അരക്കിലോ 
  • ഉള്ളി വട്ടത്തിൽ ചെറുതായി അരിഞ്ഞത്  - കാൽക്കപ്പ് 
  • പച്ചമുളക് വട്ടത്തിൽ അരിഞ്ഞത് - ഒരു ടേബിൾ സ്പൂണ്‍ 
  • ഇഞ്ചി ചെറുതായി അരിഞ്ഞത് - ഒരു ടേബിൾ സ്പൂണ്‍ 
  • വെളുത്തുള്ളി ചെറുതായി അരിഞ്ഞത് - ഒരു ടേബിൾ സ്പൂണ്‍ 
  • കുടമ്പുളി അഥവാ മീൻപുളി ചെറുതായി അരിഞ്ഞത് - അര ടേബിൾ സ്പൂണ്‍ 
  • കറിവേപ്പില - മൂന്നു തണ്ട് 
  • മഞ്ഞൾപ്പൊടി - കാൽ ടീസ്പൂണ്‍ 
  • മുളകുപൊടി - അര ടീ സ്പൂണ്‍ 
  • ഉപ്പ് - പാകത്തിന് 
  • വെള്ളം - അരക്കപ്പ് 
പാകം ചെയ്യുന്ന വിധം:

മത്തിയും വെള്ളവും ഒഴികെയുള്ള ചേരുവകൾ ഒരു മണ്‍ചട്ടിയിലാക്കി കൈ കൊണ്ട് നന്നായി തിരുമ്മി യോജിപ്പിക്കുക.  അതിലേക്ക് മത്തിയും വെള്ളവും ചേർക്കുക. അടുപ്പിൽ വെച്ച് ചെറിയ തീയിൽ വെള്ളം വറ്റിച്ചു  വേവിച്ചെടുക്കുക. 

ഹൃദ്രോഗികൾക്ക് പറ്റിയ കറിയാണിത് .

Tuesday, March 4, 2014

ഒരു സോസിന്റെ ജന്മകഥ

അവധിദിവസത്തിന്റെ ആലസ്യത്തിൽ മടിപിടിച്ചിരിക്കുമ്പോഴാണ് ആലുടിക്കി ഉണ്ടാക്കിയാലോ എന്നു മോൾ ചോദിക്കുന്നത്. വായനയുടെ ഗൗരവത്തിൽ ആണെന്നു ധരിച്ചോട്ടെയെന്ന് മനസ്സിൽ പറഞ്ഞുകൊണ്ട്,   കേൾക്കാത്ത ഭാവത്തിൽ കൈയിലിരുന്ന പുസ്തകത്തിലേക്ക് കണ്ണുംനട്ടിരുന്നു.  പക്ഷേ, അവൾ വിടുന്ന മട്ടില്ല.... ഹോ, അമ്മ അന്നുണ്ടാക്കിയ ആലുടിക്കിയുടെ സ്വാദ് , കൂട്ടുകാർ അതിനെക്കുറിച്ച് വർണിച്ചത് .... എന്നൊക്കെ പറഞ്ഞുകൊണ്ടിരുന്നു. അറ്റകൈക്ക് 'ഞാനൂടെ സഹായിക്കാം അമ്മാ...' എന്നു പറഞ്ഞ്   എന്നിലെ അമ്മയെ സെന്റിയാക്കി ....  

പിന്നെ, രണ്ടുപേരും കിച്ചണിലേക്ക് .... ഫ്രിഡ്ജ് തുറന്നുപിടിച്ച്, എന്തു വേണമെന്നറിയാതെ കുറച്ചു നേരം വെജിറ്റബിൾട്രേയിലേക്കു തുറിച്ചുനോക്കി നിന്നു... നോട്ടം ഭയന്നിട്ട് ഉരുളക്കിഴങ്ങും പച്ചമുളകും മെല്ലെ തക്കാളിയുടെ പിന്നിൽ ഒളിക്കാനൊരു ശ്രമം. എന്നെയാരും തൊടില്ലയെന്ന് തക്കാളിയിങ്ങനെ അഹങ്കാരത്താൽ ചുവന്നുതുടുത്ത് തലയുയർത്തിപ്പിടിച്ച് എന്നെയൊന്നു നോക്കി. അപ്പോഴാണ്‌ തക്കാളിയുടെ അഹങ്കാരത്തിൽ പരിഭ്രമിച്ച സോസിന്റെ കാലിയായ കുപ്പി നിലതെറ്റി വീഴാനാഞ്ഞത്.  



പിന്നെയൊന്നും ആലോചിച്ചില്ല, അഹങ്കാരിയായ തക്കാളിയെത്തന്നെ ആദ്യം പിടികൂടി. വെള്ളത്തിലിട്ട് കുളിപ്പിച്ചെടുക്കാൻ മോളെ ഏൽപ്പിച്ചു. ഏകദേശം ഒരു കിലോയോളം ഉണ്ടായിരുന്നു. കുക്കറിൽ വെച്ച് ഒരു നെലോളി പുറത്തേക്കു വരുന്നതുവരെ അടുപ്പിൽ വെച്ച് കത്തിച്ചു . ചൂടൊന്നാറിയപ്പോൾ എടുത്ത് അരിപ്പയിൽവെച്ച് നല്ലവണ്ണം തേച്ച് , അരിച്ചെടുത്തു.


എന്നിട്ട് ഒരു ചീനച്ചട്ടിയിലാക്കി വീണ്ടും അടുപ്പത്തുവെച്ചു. ഇത്തവണ കൂട്ടിനു ഒരു ടേബിൾസ്പൂണ്‍ മുളകുപൊടിയും ഒന്നരക്കപ്പ് പഞ്ചസാരയും അരക്കപ്പ് വിനാഗിരിയും ഓരോ ടീസ്പൂണ്‍ ഇഞ്ചിയും വെളുത്തുള്ളിയും അരച്ചതും  ഉപ്പും എല്ലാം  ഉണ്ടായിരുന്നതുകൊണ്ട് തക്കാളിയുടെ അഹങ്കാരത്തിന് ചെറിയ ശമനമുണ്ടായിരുന്നു. അഞ്ചു കരയാമ്പൂവും രണ്ടു കറുവാപ്പട്ടയുംകൂടെ ഒരു കിഴികെട്ടി അതിലേക്ക് ഇട്ടുവെച്ചു. നന്നായി തിളച്ചുകുറുകിവന്നപ്പോൾ കിഴിയെടുത്തുമാറ്റി. കുറച്ചെടുത്ത് രുചിച്ചുനോക്കിയിട്ട്, 'ഉം, കൊള്ളാം' എന്ന് മോൾ തലകുലുക്കി.....



പിന്നെ, തണുത്തുകഴിഞ്ഞപ്പോ സോസിനെ കുപ്പിയിലാക്കി, ഭദ്രമായി, പൂട്ടി വെച്ചു.


Related Posts Plugin for WordPress, Blogger...